Kajumissaat Elna 2026 assilisanik tusagassiortumut Oscar Scott Carlimut tunniunneqarpoq.
Taanna alutornartumik kusassagaanngitsumillu assiliisarnini pillugu aamma suliffimmi tusagassiorfiup Sermitsiap isikkuanik allannguinini pillugu kajumissaaserneqarpoq.
Kalaallit danskillu aallartitaasa USA-p nunanut allanut ministerianik vicepræsidentimillu januaarimi naapitsinerat oqaluttuarisaanermi pingaarutilik ilaatigut Oscar Scott Carlip assiliisuuffigaa.
Oscar Scott Carl tusagassiiniarluni Kalaallit Nunaanni aamma angalasarpoq, ilaatigut Tunumi. Tassani inui naligalugit, ammalluni sumiiffiinillu ataqqinnilluni naapitsivoq.
Oscar Scott Carl kisiartaalluni Sermitsiami assiliisuuvoq. Assilisai alutornartut tusagassiorfiup isikkuanik allannguipput nunatsinnilu tusagassiinermi assitalersuinermik qaffassaallutik.
-Naapikkuminartuunera ilaatigullu oqaluttuarisaanermut pingaarutilinnit tusagassiinermini piviusoq poortornagu saqqummersittarpaa, Kajumissaat Elnap tunniunneqarnerani naliliisartut sinnerlugit Erik Olsen oqarpoq.
Oscar Scott Carl tusagasseeriaatsini, tunniusimanini nutaarsiassanillu allannguilluni suliaqarnini pillugit kajumissaaserneqarpoq.
Kajumissaat pillugu
Kajumissaat Elna Tusagassiuinermi Sulisut Peqatigiiffiata 2025-mi ataatsimeersuarnerani pilersinneqarpoq ilaasortanut nunatsinni immikkuullarissumik sunniuteqartunut tunniunneqartassalluni, maannalu siullermeersumik tunniunneqarpoq.
Tusagassiortoq Elna Egediugaluaq (1953-2024) kajumissaammik atsiinermi nersorniarneqarpoq. Taanna tusagassiortutut tunniusimasuunini, pikkorissuunini apeqqusiillunilu suliaqartarnini pillugit ilisarisimaneqarluarpoq. Elna Egede TP-mit 2008-mi nersornaasigaavoq Dansk Journalistforbindimillu Carsten Nielsen-legatimik aamma ukioq taanna tunineqarluni. Nersornaasiinernut tunngaviuvoq Namminersornerullutik Oqartussat Nuummi inissiaataannik piumaneqarluartunik qinikkat atorfillillu akikinaarujussuarlugit pisisarsimanerat Elna Egedep qulaajarmagu.
Tusagassiuinermi Sulisut Peqatigiiffiata, TP-p, ataatsimeersuarnerani februaarip 28-anni Kajumissaat Elna tunniunneqarpoq.
Oqalugiaat
Asasavut TP-mut ilaasortat
Siullermeerluta Kajumissaat Elna tunniutilerparput.
Sulisumut suliffimmini annertuumik sunniuteqarsimasumut tunniunneqassaaq.
Pineqartormi takutitsilluarsimavoq.
Inuup ataatsip taama annertutigisumik sunniuteqarnera akuttusuumik takussaasarpoq.
Kajumissaaserneqartussarli taamaaliorsimavoq. Pineqartup suliffimmi isikkua malunnavissumik nammineqqissaaq periuseqarluni allanngortippaa.
Inunnik naapitsinermini naapikkuminarnera pisuniillu, aamma oqaluttuarisaanermi pingaarutilinnit tusagassiinermini, alutornartumik piviusoq poortunngivillugu alutornartumik saqqummersittarpaa.
Ilaannilu oqaluttuat oqimaassinnaasut suliarisarpai, inuillu sumiiffii ataqqillugit qiimmasaarluni naapikkuminarluni oqaloqatigisarpai.
Kajumissaaserneqartussap suleqatitut peqatigalugu oqittuunera, saaffikkuminartuaannarlunilu isumassarsioqatiginninnissamut nukissaqartuaannarnera, taamaammallu suleqatiginissaata toqqissisimanartuaannarnera suleqataata oqaatigaa.
Kajumissaaserneqartussaq peqqutaasunut annersaalluni suliartornissaq qilanaarnartuaannarpoq.
Sermitsiap isikkuanik nikisitsivoq.
Nunatsinni tusagassiorfinni assileeriaatsimik pitsanngueqataavoq.
Eqqaasippaatigut tusagassiuineq oqaasiinnarniinnani aamma assilisaniittoq.
Isigisani ataqqinninnermilu.
Nuannaarutigaarput Kajumissaat Elna uunga tunniutissallugu….
Oscar Scott Carl
Pilluarit!