"Takorluulaariarsiuk Trump inoqatinut attaveqaatimigut Truth Socialikkut Kalaallit Nunaanni nunap ataani Amerikamiut qillerinissamik kissaataannut, inatsisinik unioqqutitsisuunngitsunut nunallu taakku pingasut iluaqutissaannut, qallunaat akornusiiniarnerarlugit Danmarkimik appisaluussisoq. Københavnimi ministerit allaffiini taama pisoqarnissaa kissaatigineqanngilluinnarpoq." (TV2)
Issuaaneq TV2-mi 23/8-2026 atuarneqarsinnaasoq ersersitsivoq præsident Trumpip nunatsinni tiguaaniarluni sioorasaarinera suli qaangiutinngilluaasartoq. TV2-mi allanik aamma assersuuteqarput USA-p Danmarkimik avoqqaarliutigisinnaasaanik, ass. spiralilersuinermut tunngasoq kiisalu sakkutuut imarsiortut nunatta imartaanik nakkutilliiniaraluarlutik atortulunnerujussuat.
Tusagassiuinermik Sulisut Peqatigiiffiannut, TP-mut, ilaasortat aasap ingerlanerani isumasioqatigiillutik januaarimi nunatsinnik tatisinerup sukaruttornerani pissutsit pisimasullu eqqartorpaat tusagassiutinik inuttaqarniarnikkut ilungersunartorsioreeqisunik ilungersunartorsiortitsisut.
Trump nunatsinni sakkutuulersornikkut tiguaaniarluni sioorasaarinerata kingorna annilaanganeq nunatsinni, minnerunngitsumillu Nuummi, siaruaattoq KNR-imi Sermitsiamilu sulisut qanimut misigaat. Sioorasaarineq Danmarkimit NATO-millu sakkutuuliinikkut qisuariarfigineqarpoq, ullualunnilu pissutissaqartumik ilumut sakkutuulersorluni tiguaaniartoqassasoralugu annilaangassutigineqarpoq.
Annilaanganeq tamanna tusagassiutini sulisunut aamma siaruaappoq. Misigisimapput piareersimanatik ikiortissaaleqillutillu.
Tusagassiortut isumasioqatigiinnermi peqataasut pisortanik kaammattuipput nuna tamakkerlugu upalungaarsimanermut tusagassiutit akuutinneroqqullugit.
"Nuna tamakkerlugu upalungaarsimanermi tusagassiutit peqataatinneqarnerusariaqarput. Naalakkersuisunit ilisimatitsineq kisimi pineqanngilaq, aammali psykologinit ikiorserneqarneq, qimaaffissanik piareersaaneq aaqqissuisoqarfinnilu qanoq sillimaniartoqassasoq pilersaarusiortoqartariaqarpoq. Pilersaarutit tamakku nalornisoqannginniassammat sulisunit atuarneqarsinnaasariaqarput. Tusagassiutini sulisut annilaangallutik sulisusssaanngillat, TP-p ilaasortaat oqaaseqaamminni allapput.
Ilaasortat aamma tikkuarpaat nuna tamakkerlugu tusagassiutit ajornartoortoqartillugu suleqatigiinnerusariaqartut.
TP-p siulersuisui
Attavissaq: Siulittaasup tullia Markus Valentin Jakobsen, mavja96@gmail.com, tlf. 553875.